Axentes da Policía Local de Lugo detiveron a unha parella por agredirse mutuamente e por lesionar tamén a tres axentes, nunha actuación que tivo lugar o pasado domingo.

Segundo informaron fontes policiais, os feitos ocorreron nun edificio da rúa Magnolia, onde acudiu unha dotación da Policía de Barrio, alertada por unha discusión de parella. Unha vez no domicilio, entrevistáronse cunha muller que presentaba sangue na boca e unha ferida nunha man, que lles explicou que discutira coa súa parella porque chegara “tarde a casa e en malas condicións”. Pola súa banda, o home relatou que se agrediron mutuamente e que ela lle deu varias puñadas no peito.

O home foi detido como presunto autor dun delito de violencia de xénero e, ao ser trasladado e pasar por diante da muller, de novo ambos encerelláronse, comezando a discutir. Os axentes tiveron que separalos debido á súa actitude violenta e, no tirapuxa, tres axentes resultaron con lesións leves. Finalmente, a muller tamén foi detida por un suposto delito de violencia no ámbito doméstico e outro de atentado contra axentes da autoridade.