Tres persoas resultaron feridas en dous accidentes de circulación rexistrados este luns nos municipios lugueses de Guntín e Pantón. Segundo informaron o CIAE 112 Galicia e a Garda Civil, o primeiro dos sinistros produciuse ás 10.10 horas na estrada N-540 ao seu paso pola parroquia de Guntín de Pallares.

Alí, un turismo sufriu unha saída de vía e acabou dando varias voltas de campá. O seu condutor resultou ferido e tivo que ser trasladado en ambulancia a un centro hospitalario.

Ás 14.00 horas, na parroquia de Sengüín do municipio de Pantón, tres turismos protagonizaron unha colisión en cadea que se saldou con dúas persoas feridas. As vítimas tiveron que ser atendidas polos profesionais de Urxencias Sanitarias 061, que decidiron a súa evacuación a un hospital.