A Garda Civil investiga a catro condutores interceptados en viarios da provincia de Lugo, como presuntos autores de senllos delitos contra a seguridade viaria. Segundo informaron fontes da Comandancia, na madrugada do pasado sábado, rexistrouse un accidente no termo municipal de Meira. Alí, un turismo sufrira unha saída de vía e chocara posteriormente contra un poste de formigón.

O condutor, de 33 anos de idade, foi trasladado a un centro hospitalario e sometido alí a unha proba de alcoholemia, que arroxou resultado positivo, cun índice tres veces superior ao máximo permitido. Xa na mañá do domingo, no municipio de Sarria, foi detectada unha condutora de 24 anos de idade, que circulaba cunha taxa de alcoholemia catro veces superior á máxima permitida.

Finalmente, na madrugada deste luns, os axentes detectaron nun control no termo municipal de Lugo, a dous condutores que circulaban baixo os efectos do alcol. A primeira, unha muller de 46 anos de idade, triplicaba a taxa máxima permitida; e o segundo, un home de 59 anos de idade, tamén arroxou un nivel de alcoholemia tres veces superior ao límite.