O condutor dun turismo resultou ferido ao saírse da vía co vehículo que conducía cando trataba de esquivar a uns ciclistas en Vilalba. Segundo recolle o último parte de información da Central 112, o sinistro tivo lugar sobre as 16,30 horas, na LUP-6502, no quilómetro 7, dirección San Simón. Os bombeiros de Vilalba axudaron a saír ao home que, ao quedar o coche apoiado nun noiro, tiña dificultades para saír polos seus propios medios.
De feito, debido á posición “complexa” na que quedou o turismo, os bombeiros tiveron que empregar a porta traseira do vehículo para sacar á persoa.
Foron mobilizados os servizos de Urxencias Sanitarias de Galicia-061, a Garda Civil de Tráfico, a Policía Local e Protección Civil, ademais dos Bombeiros. O home foi trasladado en ambulancia ao Hospital Universitario Lucus Augusti da cidade de Lugo.
