A Policía Local de Lugo tramitou oito denuncias por infracción á Lei de Seguridade Cidadá por dedicarse á venda ambulante sen autorización en espazo público.
Segundo informou a Policía Local, no marco dun control da venda ambulante durante a mañá deste pasado martes efectivos da Unidade Territorial de Policía de Barrio tramitaron oito actas de denuncia por infracción á Lei de Seguridade Cidadá por ocupación de espazo público para a realización de venda ambulante.
As mesmas fontes policiais indicaron que iso supón multas de 600 euros a cada un dos infractores por estes feitos denunciados na capital luguesa. Ademais, no mesmo dispositivo realizáronse dúas actas de denuncia por infracción á Lei de Seguridade Cidadá por desobediencia a axentes da autoridade no exercicio das súas funcións, o que supón sancións de ata 30.000 euros para cada infractor, indican as mesmas fontes.
