A Policía Local de Lugo auxiliou a unha muller de 86 anos que levaba varios días tirada na súa vivenda sen conseguir levantarse debido a unha enfermidade que padece.
Segundo informou a Policía Local, durante o pasado fin de semana á rúa Lavandeira acudiu unha patrulla porque unha muller de 86 anos estaba tirada na súa vivenda desde fai “aproximadamente dúas ou tres días” e non consegue levantarse.
Os axentes acharon á muller octoxenaria “consciente, con moita dor nas pernas por mor da enfermidade que padece”, polo que foi auxiliada polos policías.
A muller manifestou que só quería deitarse na cama, polo que foi socorrida polos axentes que, co “máximo coidado”, destacan as mesmas fontes, deitárona e quedou a cargo dos seus familiares.
Por outra banda, tamén o fin de semana no adarve da muralla romana de Lugo unha patrulla municipal interveu “para acougar a unha moza de 19 anos afectada por unha crise nerviosa”. Os axentes requiriron unha ambulancia do 061 e a moza foi levada ao HULA para recibir atención médica.
Nesa mesma localización, unha patrulla atopou a unha persoa que deambulaba polo adarve da muralla “en estado de embriaguez”, destacan as mesmas fontes, co “consecuente perigo de caída”, polo que foi auxiliado por axentes e, ao rexeitar asistencia médica, foi trasladado polos policías ao seu domicilio.
Doutra banda, na zona de Costas do Parque unha patrulla atopou a un mozo de 23 anos tirado e observou que presentaba “signos de embriaguez”, polo que foi auxiliado polos axentes, que requiriron unha ambulancia para o seu traslado ao HULA.
DETIDOS
Mentres, na Rolda da Muralla a Policía Local detivo a dous homes por senllos delitos de atentado a axentes da autoridade, resistencia grave e desobediencia.
Os dous arrestados foron conducidos a dependencias policiais, onde se instruíron dilixencias para o xulgado de garda.
