Tres membros dunha familia do municipio lucense de Abadín, pai, nai e un fillo menor, foron evacuados na madrugada deste mércores con síntomas compatibles cunha intoxicación por monóxido de carbono.
Así o informou o 112 Galicia, que indicou que mareos, vómitos e perda de consciencia foron algúns dos indicios que fixeron sospeitar aos servizos de emerxencias sobre unha acumulación de gas no interior da vivenda.
Os feitos sucederon sobre as 4,30 horas deste mércores no domicilio situado no lugar de Celeirote. Segundo informou o equipo sanitario mobilizado a través do 112 Galicia, unha familia de tres membros presentaba un cadro médico compatible cunha intoxicación por monóxido.
As mesmas fontes sinalaron que faltaba, por tanto, comprobar mediante as correspondentes medicións se a acumulación deste gas no interior da vivenda provocara o malestar da familia e mesmo a perda de consciencia do neno. Deste xeito, os xestores do 112 Galicia pediron a colaboración dos Bombeiros de Vilalba, que, despois de realizar a inspección necesaria, confirmaron a alta concentración de monóxino no domicilio. Un aspecto, por certo, que xa avanzaran os detectores instalados na ambulancia de Urxencias Sanitarias de Galicia-061, que se desprazou ao lugar en canto recibiron a notificación.
Por parte do 112 sinalaron que no interior da casa nada parecía indicar a orixe, pois carece de subministración de gas e tampouco había fontes de calor acendidas. Con todo, os bombeiros localizaron unha cociña de ferro que, aínda que estaba apagada, botáranlle auga, e sospeitan que isto podería ser a causa, á espera de realizar unha revisión máis a fondo.
O 061 enviou ao lugar dúas ambulancias de soporte vital básico e un equipo sanitario da PAC de Vilalba para atender a un menor, unha muller de 37 anos, S.P.R., e un home de 59, E.R.V., todos eles trasladados ao Hospital Universitario Lucus Augusti (HULA) de Lugo, confirmaron a Europa Press fontes sanitarias.
Pola súa banda, os bombeiros procederon a ventilar a vivenda ata recuperar os niveis de normalidade.
