O frade franciscano que desempeñaba o seu labor en Pedrafita do Cebreiro e que fora condenado a 12 anos de cárcere por abusos sexuais a unha menor e a un primo desta, que presentaba unha discapacidade intelectual, morreu esta semana no Hospital Universitario Lucus Augusti (HULA).
O alcalde de Pedrafita, José Luís Raposo, lamentou o falecemento deste relixioso que se producía cando estaba ingresado na capital provincial tras ser trasladado desde a prisión de Bonxe, onde cumpría esta condena que en novembro de 2021 era ratificada polo Tribunal Supremo.
Os delitos que foron xulgados na Audiencia Provincial de Lugo remóntanse a finais de 2014 e principios de 2015, cando se cometeu ese abuso sexual continuado a unha menor de 16 anos e polos tocamentos a un primo da vítima, que padecía unha discapacidade intelectual leve.
O rexedor de Pedrafita non dubidou en lamentar a súa morte: “Do que lle coñecín, pola colaboración cos servizos públicos do Concello, foi un exemplo. Despois, que tivese outras cousas, non o sei”. “Aquí fixo un traballo de divulgación importante, polo menos ao principio e ao nivel de colaborar co Concello en todas as cousas que se facían e vía que era útil. Tanto el como todos os franciscanos foron un exemplo”, insistiu Raposo.
De feito, o alcalde confesou que si lle “sorprendeu” o caso dos abusos e mesmo deslizou que lle “custaba crelo”. “Posiblemente tivo un gran erro. Hai cousas que fixo ben e o que fixo ben hai que lembralo”, ponderou finalmente.
