O condutor dun vehículo resultou ferido na mañá deste luns tras chocar contra catro cabalos nunha estrada do termo municipal de Muras, tras o que varios equinos morreron.
Segundo os datos facilitados polo 112 Galicia, este sinistro tivo lugar sobre as 7,30 horas deste luns na estrada LU-540, ao seu paso pola Gañidoira, no municipio lucense de Muras. Un turismo impactou contra catro cabalos que irromperon na vía, o que provocou lesións ao condutor e a morte de varios exemplares. Foron varios particulares que pasaron pola zona os que alertaron ao 112 Galicia.
Este accidente, engadiron as mesmas fontes, tamén supuxo un problema para a circulación, polo menos mentres duraron os traballos de retirada dos restos da colisión e o restablecemento das condicións de seguridade na vía.
Ademais de profesionais de Urxencias Sanitarias de Galicia-061, que atenderon á persoa ferida, acudiron ao lugar do accidente os Bombeiros de Vilalba e persoal de mantemento da Axencia Galega de Infraestruturas (AXI).
A persoa afectada polo choque presentaba lesións de diversa consideración, pero estivo en todo momento consciente e comunicativa, confirmaron por parte do 112.
