Axentes da Policía Nacional adscritos á Comisaría Provincial de Lugo detiveron a dúas persoas, unha moza e un home, como autores de catro roubos con forza nun local da zona de lecer no que traballara a moza.
Segundo informou a Policía Nacional, a nova arrestada, de 22 anos, é veciña de Lugo e carece de antecedentes, mentres que o home ten 30 anos e conta con antecedentes e con estancia irregular no país.
Os roubos producíronse entre o 31 de novembro do ano pasado e o 31 de decembro, todos no mesmo local de lecer da Rúa Nova, onde a muller tamén detida como coautora dos feitos traballara.
No primeiro dos roubos accedeuse ao local sen forzar nada, supostamente coas chaves da ex empregada, sinalan as mesmas fontes, co que a investigación se puxo en marcha cara ás persoas que puidesen ter acceso do local.
No tres posteriores roubos, unha vez cambiouse a fechadura, entraron a través dunha xanela do piso superior “e sempre con forza”, destaca a Policía. Froito deles levan botellas de bebidas, o cambio da caixa rexistradora e o bote de propinas.
Cando se centrou a investigación e con todos os indicios recolleitos no lugar procedeuse á detención destas dúas persoas. O home detido é o mesmo que na noite do mércores atracou a un transeúnte na rúa Galicia, onde foi arrestado polas dotacións de Radiopatrullas da Policía Nacional.
Froito destas detencións, este pasado xoves, unha vez é posto a disposición xudicial, o individuo ingresou en prisión. Pola súa banda, a moza quedou en liberdade con cargos, á espera de xuízo.
