O incendio no polígono industrial do Ceao, que afectou a seis naves, segue sen estar extinguido na súa totalidade cinco días despois de iniciarse.
Diso informou este venres a alcaldesa de Lugo, Lara Méndez, quen destacou que “o incendio está controlado, pero non apagado na súa totalidade”. “Si que é verdade que cada día que pasa vai minorando, e séguese ‘in situ’ facendo un control exhaustivo da zona para evitar calquera risco que se poida dar”, explica sobre o lume iniciado o pasado domingo.
Deste xeito, “faise un seguimento” por parte dos bombeiros “para que nos próximos días se poida certificar que está apagado o lume xa na súa totalidade”.
A rexedora lucense advertiu que, este “seguimento” faise por “se pode quedar unha bolsa de aire mergullada que vaia a provocar algún tipo de combustión, e ante a dúbida hai constantemente un retén de bombeiros”. “A refrixeración vai cambiando, antes estabamos constantemente botando auga e agora xa non se fai como nos primeiros días. Baixouse en canto a intensidade”, explicou.
Sobre a volta á normalidade no pulmón económico da cidade de Lugo, Lara Méndez confesou que é “difícil” dar prazos “porque os técnicos tampouco saben a previsión de como vai evolucionar esta situación”. “Como dicimos, o lume está controlado pero non apagado, e hai que ser cautos e ver o día a día”, incidiu.
A alcaldesa subliñou que “salvo un dos afectados” das seis empresas, ao “que lle ardeu todo”, o resto tiñan outras naves, o que lles permitiu seguir coa actividade”. “Quero agradecer o esforzo dos empresarios para manter os postos de traballo (máis de cen) nunha situación tan complicada e tan complexa”, valorou finalmente Lara Méndez.
