A Garda Civil propuxo para sanción na tarde do pasado sábado a un establecemento hostaleiro de Guitiriz en cuxo interior había máis de vinte persoas consumindo bebidas sen respectar as restricións máximas que ata daquela rexían no municipio.

Alleos ao peche perimetral e á prohibición de apertura no interior de bares —medidas que se relaxaron en Guitiriz da madrugada do sábado para o domingo—, foron sorprendidos por axentes da Garda Civil. Non era a primeira vez que este local incumpría a normativa da Lei de Saúde de Galicia, pois xa fora denunciado no mes de xaneiro por feitos similares.

Nesta ocasión, os axentes comprobaron que había un home tomando un café na barra mentres conversaba coa camareira, ademais doutros cinco clientes que consumían bebidas espirituosas a carón da barra. A sorpresa foi maiúscula ao inspeccionar a terraza traseira, onde atoparon dúas mesas ocupadas con 16 persoas non conviventes, os cales estaban sen máscara e sen manter a distancia de seguridade.

Tras a identificación dos infractores, sóubose que cinco deles vulneraran tamén o peche perimetral que rexía daquela en Guitiriz. Proviñan do concello de Carral, Monfero, Cerceda, Ordes e A Coruña. Ademais, tamén se identificou un mozo de 19 anos de nacionalidade dominicana que se atopa en situación irregular en España.

Segundo o relato da Benemérita, “a anécdota da xornada protagonizárona ás 18:00 horas, hora de peche do local, catro clientes da terraza”, que lle preguntaron aos axentes: “Podemos tomarlle outra? A última”.

A inspección rematou con proposta de sanción de ata 60.000 euros para o establecemento, e de entre 100 e 3.000 para os clientes.