A Garda Civil detivo no municipio lucense de Rábade a un home, de 45 anos de idade, sobre o que un xulgado de Bilbao emitira unha orde de procura e captura.

En concreto, segundo informa o Instituto Armado, trátase dun home de nacionalidade senegalesa sobre o cal constaba unha requisitoria para o seu ingreso en prisión, que emanaba do Xulgado do Penal número 7 de Bilbao.

Tras a súa detención por parte da Garda Civil, procedeuse ao seu ingreso no centro penal de Bonxe.

DELITO DE FURTO

Por outra banda, a Benemérita imputou a unha veciña do municipio lucense de Barreiros como suposta autora dun delito de furto por apropiarse dunha ‘tablet’.

Os feitos ocorreron o pasado 19 de novembro, cando un empregado dunha empresa de paquetería deixou no rellano de acceso a un edificio de vivendas un paquete con este dispositivo, valorado en 350 euros.

A investigación iníciase por mor da denuncia da lexítima propietaria, que cando foi a recoller o paquete viu que non estaba no seu lugar. Así, imputouse a unha veciña por un delito de furto, tras o cal foi posta a disposición do Xulgado de Primeira Instancia e Instrución número 2 de Mondoñedo.

DELITO CONTRA A SEGURIDADE VIARIA

Ademais, a Garda Civil imputou a un veciño de Antas de Ulla de 57 anos de idade como presunto autor dun delito contra a seguridade viaria, xa que conducía un ciclomotor pola N-640 sen obter nunca a autorización.

A persoa investigada tamén foi posta a disposición xudicial.