Axentes da Policía Local de Lugo denunciaron esta fin de semana a dúas persoas na cidade por saltar o toque de queda, así como a outros catro cidadáns por non levar posta a máscara obrigatoria mentres transitaban pola vía pública.
Os dous primeiros foron interceptados pola rúa o pasado sábado, 7 de novembro, despois das 23:00 horas. Ningún deles puido xustificar o motivo para incumprir o toque de queda decretado polo Goberno de España, de modo que agora enfróntanse a unha posible sanción de entre 600 e 30.000 euros.
O mesmo día tamén foron denunciadas catro persoas por non facer uso da máscara nas rúas Camiño Real e Avenida da Coruña. De feito, unha das persoas denunciadas estaba “tusindo e molestando os viandantes nunha zona de notable tránsito peonil”, explica a Policía Local nun comunicado.
