Un cidadán avisou á Policía Local de Lugo porque persoal de recepción dun centro sanitario non facía uso da máscara “nin cando interactúa cos cidadáns”.

Así o relatou a Policía Local, que indicou que ás 20,30 horas deste luns pasado un cidadán requiriu a presenza policial nun centro sanitario de Lugo xa que, segundo dixo, o persoal de recepción e información non había uso da máscara obrigatoria “en ningún momento, nin sequera cando interactúa cos cidadáns”.

Segundo indicaron as mesmas fontes, tiñan instalado un biombo protector, pero subíana “para falar con quen ía solicitar información”.

Unha vez no lugar os axentes comprobaron a veracidade da información e procederon á identificación do traballador, que manifestou “non recibir ningunha directriz da dirección do centro de saúde sobre o uso de máscara, aínda que lles dotaban de biombo protector”, matizou.

Por iso, os axentes informáronlle de que, segundo a normativa vixente, toda persoa maior de seis anos está “obrigada ao uso de máscara en todo momento, tanto cando estea en vía pública e en espazos ao aire libre, como en espazos pechados de uso público ou que se atopen abertos ao público“, aínda que se poida garantir a distancia de seguridade interpersoal, salvo que se atope “nalgunha das excepcións reglamentadas”.

Por iso, a Policía Local de Lugo sinalou que dará conta á Consellería de Sanidade para a tramitación do correspondente expediente sancionador.