Unha familia da parroquia de Carral, en Begonte, denuncia que o seu gato recibiu varios disparos de perdigóns no día de onte, 27 de abril, cando permanecía no interior do predio particular. Os donos do felino puxeron os feitos en coñecemento da Garda Civil, pero non chegaron a interpoñer denuncia por non saber a ciencia certa quen fora o responsable dos tiros.
“A iso das 13:00 horas escoitamos un ruido fóra e saímos correndo para ver que ocorría”, relata Andrea Vargas, que se puxo en contacto co Lugo Xornal. “O gato entrou correndo e xa vimos que estaba ferido e asustado”. Segundo explica, ao outro lado da estrada viron un grupo de homes, pero non se atreve a acusalos directamente porque non presenciaron os disparos como tal. “Supoño que serán cazadores que se aburren de estar na casa e que disparan ao primeiro que se move”, lamenta.
Ante o estado do gatiño, de nome Shiva, acudiron á clínica veterinaria, onde lles confirmaron que o animal recibira 18 balazos que lle provocaron un traumatismo cranial e torácico. “Iso non é un susto nin un erro. Perforoulle a orella de lado a lado, perdeu o ollo dereito e un dos perdigóns chegoulle ao pulmón“, describe Andrea Vargas, para engadir que Shiva se atopa agora mesmo na casa familiar.
Evoluciona favorablemente en compañía de Budha, o outro felino da familia, pero aínda non está totalmente descartada unha intervención cirúrxica en caso de empeorar.
“INSEGURIDADE E MEDO”
“Sentimos inseguridade, isto deixa o medo no corpo. Hai xente que está saltando as normas do confinamento e disparando sen máis”, prosegue. Andrea confesa o sufrimento da familia, sobre todo da súa filla de trece anos, que está moi apegada ao gatiño e que “agora ten medo a que volvan disparar preto da casa”, situada a carón da N-VI entre Begonte e Rábade. “Que se saiba isto e que se reflexione sobre o maltrato animal e sobre a calidade humana. Todos estamos confinados nas nosas casas sen poder saír, pero enriba pasan estas cousas”, remata.
