EFE | O forte cheiro a fume que saía do interior dunha vivenda da Avenida da Coruña, en Lugo, puxo en alerta aos veciños dun ancián de 94 anos que vivía só. Tras avisar aos servizos de emerxencia, estes lograron acceder á casa, onde atoparon o señor tirado e consciente na cociña. Levaba dous días sen poder levantarse.

Segundo informou a Policía Local, os feitos sucederon onte, 6 de abril, á medianoite. Despois da chamada dos veciños, efectivos do Grupo Operativo Nocturno da Unidade Territorial de Policía de Barrio de Lugo accederon en compañía dunha dotación de Bombeiros ao interior do piso para dilucidar a orixe dun forte cheiro a fume.

Un vez dentro, os axentes atoparon tirado no chan da cociña e consciente a un ancián de 94 anos anos de idade, propietario da vivenda, que era incapaz de erguerse. Tamén descubriron que a orixe do fume era unha pota totalmente queimada que estaba sobre a vitrocerámica acesa. Posto que tal cheiro foi percibido polos veciños o día 4 pola noite, a Policía Local sospeita que o “home caeu daquela e non puido levantarse desde entón”.

Despois de prestarlle os primeiros auxilios, os axentes solicitaron axuda ao 061, que se ocupou do seu traslado ao HULA. Posteriormente, foi localizado un familiar do ancián, que vive só, para informalo do sucedido.