Unha muller de 43 anos de idade foi detida por malos tratos no ámbito familiar tras agarrar polos pelos e darlle unha cabezada á súa filla de 10 anos na cidade de Lugo.
Segundo informou a Policía Local, a detención produciuse sobre as 21:30 horas deste martes, 14 de xaneiro. Os feitos sucederon cando os axentes acudiron á Praza de Santo Domingo, onde unha nena de 10 anos fora agredida pola súa nai ao “collela polos pelos” e propinarlle “unha cabezada na fronte”, concretou a Policía. Ante as preguntas dos axentes, a menor manifestou que súa nai xa lle dera labazadas noutras ocasións.
Os policías identificaron, ademais, a varias testemuñas que corroboraron o declarado pola menor, motivo polo cal a nai foi detida.
Tanto a nai como a menor foron trasladadas ao Hospital Universitario Lucus Augusti (HULA) de Lugo para recibir asistencia médica. Posteriormente, a detida foi levada a dependencias policiais para a instrución das dilixencias no xulgado competente nesta materia.
