Axentes da Policía Nacional adscritos á Brigada Provincial de Seguridade Cidadá detiveron un home de 35 anos por un delito de roubo con forza en máquinas expendedoras e atentado a axente da autoridade por resistirse ao arresto e ao traslado a comisaría.
Segundo informou a Policía Nacional, os feitos ocorreron no Día de Reis sobre as 17,00 horas cando un cidadán propietario dunhas máquinas expendedoras situadas na rúa Camiño Real se puxo en contacto a través da sala do 091 para comunicar que observara nas cámaras de gravación que vixían a zona como un home de complexión normal e uns 40 anos golpeara os cristais de protección e as caixas das maquinas.
Unha vez se personaron as dotacións de Radiopatrullas no lugar, o autor xa non estaba, pero, coa “clara descrición” achegada e as imaxes mostradas polo propietario do establecemento, froito das gravacións realizadas durante o intento de roubo, explicou a Policía, púxose en marcha un dispositivo para a localización do autor.
Ao mesmo tempo, avisaron dos feitos á Brigada de Policía Científica para realizar o informe pericial do lugar xa que, entre outras probas, na zona había “moitos cristais manchados de sangue”, concretaron as mesmas fontes.
Minutos despois recibiuse outra chamada na sala operativa do 091, nesta ocasión dun familiar do comerciante anteriormente prexudicado que manifestou que o autor dos danos e roubo anterior se atopaba “golpeando e causando desfeitas nos portais da mesma rúa“, sinalou a Policía. Como había dotacións no lugar, o individuo foi interceptado “de inmediato”, destaca a Policía.
Os policías procederon á súa identificación e detención tras ser recoñecido “sen ningún xero de dúbidas como autor de roubo con forza nas máquinas expendedoras”, subliñaron as mesmas fontes.
“MOI AGRESIVO”
No momento que é introducido no vehículo policial, o detido arremeteu “de forma contundente e moi agresiva”, asegura a Policía, contra os funcionarios de policía que procedían á súa detención. Deste xeito, tivo que ser reducido para poder trasladalo a dependencias policiais. Durante este traslado continuou “coa actitude agresiva golpeando e causando danos no interior do vehículo policial”, asegurou a Policía.
