Dous mozos menores de idade foron detidos por un roubo con forza en máquinas expendedoras de Lugo. Os feitos ocorreron a pasada madrugada na céntrica rúa Clérigos.
Axentes da Policía Nacional adscritos á Brigada de Seguridade Cidadá, no servizo de Radiopatrullas, foron os encargados da detención.
Un veciño da zona alertou, a través da sala do 091, de que uns mozos golpeaban as máquinas expendedoras situadas en dita rúa. Por iso, axentes da Policía Nacional activaron un dispositivo co fin de localizar os mozos. Cun vehículo que se dirixiu ao lugar e outro que circulaba polas rúas adxacentes, a Policía seguiu en contacto co alertante para seguir os pasos dos autores.
Unha vez no lugar e ante a presenza policial, dous mozos fuxiron da zona, pero foron interceptados de inmediato polo outro indicativo de Radiopatrullas que estaba nas inmediacións.
Deste xeito, procedeuse á detención dos dous menores por un delito de roubo con forza. De todo iso foi informado o xulgado de garda e o Ministerio Fiscal.
