A Garda Civil desmantelou unha organización criminal especializada en roubos en tendas de telefonía móbil. Foron detidos o tres integrantes da organización, aos que se lles atribúen máis de dez roubos nas provincias de Asturias, Cantabria, Valencia e Lugo. O xuíz decretou o ingreso en prisión de todos eles.
Con esta actuación recuperouse gran cantidade de teléfonos móbiles de alta gama, así como diñeiro en metálico e diversos útiles empregados na comisión dos feitos delituosos, segundo informou a Garda Civil en nota de prensa este mércores. En total, valorouse o material subtraído e os danos ocasionados en máis de 150.000 euros.
A detención tivo lugar o pasado sábado 19 de outubro. A investigación, levada a cabo polo Equipo de Patrimonio da Unidade Orgánica de Policía Xudicial da Comandancia de Oviedo e o Equipo Territorial de Policía Xudicial de Luarca, comezou este mes cando se detectou un incremento de roubos cometidos en tendas de telefonía móbil.
Os roubos eran cometidos de noite, a altas hora da madrugada, cando non había persoas próximas aos establecementos. A súa maneira de actuar era a de violentar os cristais dos escaparates dos locais comerciais mediante fractura, empregando para iso un bloque de formigón ao que ataban unhas cordas para o seu uso a modo de ariete. Unha vez dentro das tendas, fracturaban o mobiliario con machadas, centrando a súa actividade na subtracción de móbiles de alta gama.
