Axentes da Policía Nacional detiveron a dous individuos en Lugo por senllas agresións ocorridas na zona monumental da capital luguesa. A un deles cónstanlle 11 antecedentes.
Segundo informou a Policía Nacional, en ambos os casos os arrestos producíronse despois dunha primeira actuación de efectivos da Brigada Provincial de Seguridade Cidadá e a posterior intervención da Brigada de Policía Xudicial, quen realizou as investigacións e comprobacións a efectos de identificación e localización do autor da agresión dun deles.
Un dos detidos, un home novo “con innumerables antecedentes por distintos feitos”, destacou a Policía, a pasada madrugada “viuse involucrado nunha pelexa e desavinzas nos locais de lecer da zona centro”, onde lle teñen prohibida a entrada, relataron as mesmas fontes policiais.
Por iso, foi requirida a presenza das dotacións de Policía Nacional, que desprazou tres dotacións ás que, unha vez falan co requirente, lles manifesta o sucedido.
Así, unha vez localizan e identifican ao detido, este “mostra manchas de sangue en diversas partes da súa roupa”, sinala a Policía, que o mozo atribúe a unha pelexa no parque de Rosalía de Castro. O mozo, “nun estado moi alterado e agresivo cara aos policías”, profire, destacan as mesmas fontes, “insultos e ameazas de diversa índole”. Por iso, despois de tratar de acougalo e tranquilizalo, finalmente é detido por un delito de atentado a axente da autoridade.
SEGUNDO ARRESTADO
Doutra banda, foi detido outro mozo por uns feitos ocorridos a principios do mes de agosto, onde xa interviñeran dotacións da Brigada de Seguridade Cidadá, xa que a vítima fora agredida por outra persoa, a cal a agarrou por detrás e tirado ao chan, debido ao que perdeu a consciencia e sufriu unha fenda na cabeza, tras o que foi trasladado ao Hospital Universitario Lucus Augusti (HULA).
Con todo, a vítima non presentou denuncia ata o pasado xoves. Entón, funcionarios da Unidade de Delincuencia Organizada e Delitos especialmente Violentos (UDEV), co nome de pila achegado polo agredido, e demais datos que obran en arquivo da Comisaría de Lugo da intervención de Seguridade Cidadá do día dos feitos, localizaron ao autor e procederon á súa detención. De todo iso foi informado o xulgado de garda.
