Un condutor que obtivo resultado positivo na proba de alcoholemia tras estar implicado nun accidente de tráfico este fin de semana en Lugo foi investigado por un suposto delito contra a seguridade viaria.
Segundo informou a Policía Local de Lugo, na noite do venres 27 de setembro, como consecuencia dun accidente de circulación na Avenida Infanta Elena, detectouse a un condutor implicado con “síntomas de embriaguez“.
As mesmas fontes indicaron que, ao ser sometido ás probas de alcoholemia, obtivo resultado positivo de 0,80 miligramos por litro de aire expirado. Por iso foi investigado por un delito contra a seguridade viaria.
Mentres, á primeira hora da mañá do 29 de setembro unha patrulla detectou un vehículo que circulaba pola rúa Montefaro en zig-zag. Por iso, axentes procederon a darlle o alto e comprobaron que o condutor presentaba “síntomas de embriaguez.
Por iso foi sometido ás probas de detección alcohólica, nas que obtivo resultado de 0,77 miligramos por litro de aire, polo que se instruíron dilixencias por un suposto delito contra a seguridade viaria na modalidade de xuízo rápido.
