Unha colisión entre un coche e un autobús que circulaban pola rúa Galicia, en Lugo, saldouse cunha persoa ferida na mañá deste venres.

Segundo informou o 112 Galicia, o accidente ocorreu sobre as 11.00 horas. Foi un particular quen solicitou asistencia sanitaria para o condutor dun turismo que chocara contra un autobús. Indicou, tamén, que no autocar viaxaba xente, pero non estaban feridos.

Por iso, pasouse aviso a Urxencias Sanitarias de Galicia-061, á Policía Local, aos Bombeiros da cidade e a Protección Civil. Testemuñas que presenciaron o accidente comunicaron ao 112 Galicia que, aínda que no turismo viaxaban dúas persoas, só o condutor necesitou ser trasladado polos servizos sanitarios. No autobús viaxaban 60 pasaxeiros, que resultaron todos ilesos.