A Garda Civil detivo en Outeiro de Rei unha veciña de Lugo de 67 anos de idade como presunta autora dun delito de tráfico de drogas. Ao parecer, a muller proporcionáballe sustancias estupefacientes a un familiar que estaba na cárcere de Bonxe. Levaba a droga oculta na roupa interior.
Segundo informou o Instituto Armado, os feitos sucederon cando a muller, nunha visita autorizada a un familiar seu que cumpre condena nun centro penal, “pretendía introducir supostas sustancias estupefacientes que portaba ocultas na súa roupa interior”.
Unha vez se procedeu á súa detención, a muller fixo entrega voluntaria de 25 gramos dunha sustancia, supostamente haxix, e de 15 pastillas de cor branca, presuntamente da familia das benzodiacepinas. A muller detida foi posta a disposición do Xulgado de Instrución número 1 de Lugo.
FURTO
Por outra banda, a Garda Civil investiga no termo municipal de Castroverde a un veciño de Lugo de 73 anos como presunto autor dun delito de furto de diversos obxectos valorados en 500 euros. A persoa investigada en relación con estes feitos foi posta a disposición xudicial, sinalaron as mesmas fontes.
