O Concello de Lugo completou este mércores o proceso administrativo necesario para legalizar e ampliar as instalacións da Sociedade Protectora de Animais e Plantas coa concesión definitiva da licenza urbanística, que foi aprobada nunha xunta de goberno local. Esta resolución supón o paso final para a execución dun proxecto valorado en máis de 517.000 euros, que xa conta con todos os informes técnicos favorables, cumpre cos requisitos legais e ambientais e no que está previsto que cooperen as tres administracións, Concello, Deputación e Xunta.
O plan permitirá dotar ao refuxio de Muxa de novas instalacións, entre elas un edificio de recepción e clínica veterinaria, unha residencia e zona de corentena para gatos, un parque de caniles sectorizado, así como melloras nas áreas de servizo, almacenamento, aparcadoiro e a instalación de paneis solares. O prazo de execución estimado é de 36 meses, con fases que garantirán a continuidade do servizo durante as obras. A portavoz do grupo municipal Socialista, Ana Fernández Abelleira, subliñou que “por fin, despois de moito tempo e grazas á mediación municipal, existe un proxecto viable, solvente e con respaldo técnico; só falta a vontade política para facelo realidade. Lugo e o benestar animal merecen ese compromiso conxunto, á marxe das diferenzas políticas”.
Fernández Abelleira lembrou que o Concello “xa cumpriu a súa parte, dispón da consignación orzamentaria necesaria e acompañou á Protectora durante todo o proceso técnico”. O alcalde insistiu na importancia de que a Xunta de Galicia “formalice canto antes o convenio de financiamento, como xa fixo a Deputación Provincial, para que Lugo conte cun espazo moderno e eficiente para o coidado dos animais”. O Goberno local reitera así o seu compromiso cunha entidade que leva décadas adicándose á atención de animais abandonados, e á que o Concello destinou máis dun millón de euros nos últimos cinco anos. “Este proxecto é unha mostra do noso compromiso co benestar animal e coa colaboración institucional en positivo”, engadiu a portavoz.
ACORDO CO CD LUGO
A Xunta de Goberno Local aprobou tamén a adxudicación do uso do campo municipal José Carballido Cerceda ao CD Lugo SAD, que poderá utilizalo para adestramentos e outras actividades deportivas. O acordo, cunha vixencia inicial de dous anos prorrogables ata dez, permitirá ao clube dispor dun espazo complementario ao estadio Anxo Carro para desenvolver a súa actividade diaria. O convenio establece que o clube asumirá o mantemento ordinario das instalacións e disporá dun seguro de responsabilidade civil. Con esta medida, o Concello reforza a súa colaboración cun dos principais referentes deportivos da cidade e promove un uso eficiente e responsable das instalacións municipais, póndoas ao servizo do deporte e da cidadanía.
Por outra banda, o Goberno local aprobou a declaración de caducidade dunha licenza urbanística concedida en 1992 para a construción dun edificio na rúa Serra de Meira, cuxa obra permanece inacabada. A medida afecta a unha das dúas edificacións autorizadas no seu día e pon fin a un permiso que incumpría os prazos de execución establecidos. Con esta decisión, o Concello de Lugo continúa o seu labor de revisión e actualización de expedientes urbanísticos antigos, co fin de garantir o cumprimento da normativa e evitar situacións de abandono ou inseguridade xurídica.
