A Fiscalía de Lugo pide 13 anos de cárcere para un home acusado dun delito de agresión sexual con acceso carnal a menor de 16 anos. O caso, que procede do Xulgado de Instrución Nº2 de Viveiro, xulgarase este xoves, a porta pechada, na Audiencia Provincial de Lugo. Segundo recolle o escrito do Ministerio Fiscal, os feitos sucederon en abril de 2023 no domicilio da nai, onde a vítima residía.

Así, piden para o acusado que se lle impoña a prohibición de achegarse a menos de 500 metros de distancia e comunicarse por calquera medio coa menor, por un período de 20 anos, a medida de liberdade vixiada durante 10 anos, que se executará con posterioridade á pena privativa de liberdade imposta; privación da patria potestade, tutela, curatela, garda ou acollemento por un tempo de 10 anos e a súa inhabilitación especial para calquera profesión, oficio ou actividades, sexan ou non retribuídos, que leve contacto regular e directo con persoas menores de idade, por tempo de 20 anos. O acusado indemnizará á vítima na cantidade de 10.000 euros e ao Sergas na cantidade de 711,79 euros pola asistencia sanitaria prestada á menor.