O alcalde de Lugo, Miguel Fernández, recibiu información do Ministerio de Transportes para estudar a inclusión do municipio na futura implantación do billete único nas urbes españolas en 2026. O rexedor municipal mantivo unha reunión coa secretaria xeral de Mobilidade Sustentable, Sara Hernández del Olmo, quen lle explicou a folla de ruta para avanzar nesta iniciativa xa operativa noutros países europeos.
O obxectivo do billete único é simplificar o acceso ao transporte público, de forma que un só billete sirva para viaxar en distintos medios por todo o territorio estatal e se potencien estes servizos cun abono nacional por unha cantidade determinada. O alcalde considera que “se trata dunha iniciativa positiva que impulsa a visión transversal do transporte público en todas as cidades españolas que queiran adherirse e que avanza en aspectos positivos non só para a propia cidade e para os lucenses, senón tamén para favorecer e mellorar a mobilidade do turismo”.
