O presidente da Deputación de Lugo, José Tomé Roca, agradeceu á Asociación para a Loita Contra as Enfermidades do Ril (Alcer) de Lugo o “asesoramento personalizado, apoio social, físico, psicolóxico e nutricional” co que “melloran a calidade de vida e benestar dos pacientes con enfermidade renal crónica” desde hai máis de 40 anos.
Fíxoo este xoves, xunto ao deputado de Promoción Económica e Social, Pablo Rivera Capón, na súa visita á mesa de peditorio que Alcer instalou fronte ao Pazo de San Marcos, con motivo de celebrar o Día Mundial do Ril, segundo informou o organismo provincial nun comunicado.
Do mesmo xeito, durante este encontro, que se celebra o segundo xoves de marzo de todos os anos co fin de concienciar á poboación na prevención e detección precoz da enfermidade renal crónica, Tomé subliñou o “firme compromiso” que a deputación ten con Alcer ao investir anualmente 6.000 euros na entidade.
Respecto disto, Tomé tamén sinalou que a deputación é “plenamente consciente” de que as administracións públicas “deben estar á beira deste tipo de colectivos” e que é importante “apoiar as súas accións e actividades” que “sensibilizan directamente aos veciños e veciñas”.
Ademais, Alcer tamén instalou unha mesa fronte ao Concello de Lugo e outra fronte ao Hospital Universitario Lucus Augusti para trasladar a importancia de coidar a saúde renal e informar de hábitos de vida saudable para persoas que padecen este tipo de dores.
AS CONDOLENCIAS POR PAULA ALVARELLOS
O presidente da deputación tamén agradeceu ao Duque de Alba e Conde de Lemos, Carlos Fitz-James Stuart e Martínez de Irujo, as súas condolencias polo falecemento da alcaldesa de Lugo, Paula Alvarellos.
Do mesmo xeito, Tomé tamén trasladou as súas condolencias á familia de Paula Alvarellos e resaltou que o acto do Duque de Alba e Conde de Lemos é un reflexo do respecto e admiración que a perdida da alcaldesa suscito fóra de Lugo.
