A Audiencia Provincial de Lugo fixou para o vindeiro xoves, día 6, o xuízo contra dúas mulleres, nai e filla, acusadas de estafar 16.500 euros a unha anciá con deterioración cognitiva, nai e avoa, respectivamente, das procesadas.
Segundo o escrito de acusación fiscal, os feitos remóntanse aos anos 2012 e 2013, cando as acusadas convivían no municipio lucense de Taboada coa vítima, que padecía problemas de memoria desde o ano 2007.
Dentro desta convivencia, a finais de 2013 foi necesaria a intervención dos servizos sociais do Concello de Chantada, dado que a anciá “achábase nunha situación de desamparo grave”. A súa deterioración cognitiva agravouse neste período, de maneira que a muller “non era capaz de lembrar aspectos relevantes e importantes da súa vida, sendo facilmente manipulable e non estando capacitada para realizar transaccións económicas de relevancia. A vítima foi declarada incapaz en febreiro de 2014 e nomeouse como a súa titora á súa outra filla.
Con todo, no período previo á súa declaración de incapacidade, e mentres convivía coa filla e a neta agora procesadas, ambas puxéronse de acordo para que a muller acudise ao banco a retirar “importantes sumas de diñeiro” para entregarllo a elas. Nunha das retiradas, unha das acusadas chegou a falsificar a súa firma. En total, fixéronse con 16.500 euros, que agora se reclama a súa devolución.
Ademais, Fiscalía pide para elas dous anos e medio de prisión polo delito de falsidade documental, dado que considera que o delito continuado de estafa é obxecto dunha eximente completa por ser as acusadas descendentes da vítima e non existir violencia ou intimidación.
