O Xulgado do social número 1 de Lugo recoñeceu o dereito dunha gerocultora da residencia de maiores de Castro Ribeiras de Lea (un centro concertado de xestión privada), en Lugo, a percibir o plus de nocturnidade recollido no convenio.
Segundo CSIF, que se fixo eco da sentenza, as empresas adxudicatarias do servizo foron condenadas ao abono de 2.965,34 euros máis os intereses correspondentes á traballadora.
O sindicato sinala que as adxudicatarias non viñan abonando o plus de nocturnidade na cantidade establecida polo V Convenio Colectivo do sector Residencias Privadas de Galicia.
Por iso, a traballadora acudiu ao Xulgado do Social en defensa dos seus dereitos, representada polos servizos xurídicos de CSIF Lugo.
CSIF CELEBRA O FALLO
Neste sentido, a sentenza considera que resulta acreditado que se lle deben as cantidades que reclama na súa demanda.
CSIF felicítase por este fallo, que, remarca, pon en evidencia “os incumprimentos” das empresas que xestionan este centro na aplicación do convenio colectivo, “non respectando os dereitos das persoas traballadoras”.
