Os principais establecementos hoteleiros da cidade de Lugo rexistran xa, a falta de pouco máis dunha semana para o inicio das festas de San Froilán, que se celebrarán na capital provincial do día 4 ao 12 de outubro, unha taxa de ocupación media de en torno ao 75% para as datas centrais do evento, os dous fins semana nos que a previsión apunta a que se colgará o cartel de completo en todos os aloxamentos.
Os establecementos, hospedaxes e cadeas hoteleiras consultados por Europa Press auguran que os dous sábados das festas patronais; o 5 de outubro –día do patrón e véspera do denominado ‘Domingo das Mozas’— e o 12 de outubro –que botará o peche aos festexos– o cheo “está asegurado”.
Así o indica o ritmo das reservas que manexan os responsables dos propios hoteis a falta de nove días para o inicio das celebracións coa tradicional lectura do pregón e tamén a dispoñibilidade existente nos principais buscadores de aloxamentos, inferior nestes momentos ao 25% para o primeiro fin de semana de outubro e ao 30% para o segundo.
“A expectativa para os fins de semana é alcanzar o 100% de ocupación ou polo menos rozalo, especialmente os dous sábados, que son sempre os días centrais”, vaticina, en declaracións a Europa Press, Cheché Real, presidente da Asociación Provincial de Empresarios de Hostalaría e Turismo de Lugo (APEHL).
EVOLUCIÓN DAS RESERVAS
Aínda que a previsión de ocupación hoteleira para as festas de San Froilán de Lugo, declaradas de Interese Turístico Galego e de Interese Turístico Nacional, fluctúa moito entre os días laborables, reservados a “un turismo máis interior”, e os fins de semana, de maior proxección nacional, desde o sector confían en que as reservas de última hora poidan contribuír a cumprir cunhas expectativas que se antollan favorables.
O hotel Méndez Núñez, por exemplo, un dos máis céntricos da cidade e tamén dos máis asentados, manexa neste momento un volume de reservas confirmadas do 75% para os dous fins de semana das festas patronais. “A expectativa é ter unha ocupación do 100% os dous fins de semana e roldar polo menos o 90% os días entre semana”, apuntan. Un dato similar ao que rexistra o hotel Apartamentos Cidade de Lugo, que xa ten reservadas “máis do 75%” das súas habitacións para o mesmo período.
Noutro dos clásicos da cidade, o hotel Torre de Núñez, situado nos arredores da capital, o volume de reservas supera xa o 70%. A previsión para os fins de semana das patronais é colgar o cartel de completo. “Calquera dos dous sábados, tanto o día 5 como o 12, estaremos seguro ao 100% en canto a habitacións e o restaurante ao mediodía estará tamén cheo sábado e domingo”, aseguran.
As expectativas de ocupación non son distintas no Hotel Auditorio Santiago & Spa, que confía en despachar ao longo da presente semana as súas 67 habitacións dispoñibles “polo menos para os días 5 e 12” –as reservas para o primeiro deles superan xa o 80%–; nin para a céntrica Hospedaría San Froilán, moi próxima á praza Horta do Seminario –escenario de moitos dos concertos programados– que a pesar de contar cunha previsión de ocupación “máis baixa entre semana” rexistra xa un volume de reservas do 80% para o sábado 5 e do 95% para o 12.
PENDENTES DO CEO
Pero se hai un factor que pode chegar a resultar determinante á hora de cumprir as expectativas de ocupación previstas e mesmo de poder chegar a superalas, ese é, coinciden en sinalar desde o sector turístico lucense, o clima.
“As previsións de ocupación sempre están relacionadas coa climatoloxía. Estamos a expensas diso. E para nós unha boa climatoloxía é que non chova. Se chove, hai moita xente que pode cambiar o destino e mesmo algunhas reservas pódense caer”, explica Cheché Real, para quen o índice de precipitacións que se poidan chegar a rexistrar durante a celebración dunha das grandes festas do calendario do outono galego é unha variable “básica” a tomar en conta, “un actor principal”.
“Acabamos de ter o Caudal Fest e a cidade estivo abarrotada, o verán estamos a levalo moi ben, cunha ocupación altísima e agora só dependemos da auga”, gabia, acto seguido, o tamén presidente da Confederación Galega de Empresarios de Hostalaría e Turismo (Hostalaría de Galicia).
