O tenente da alcaldesa do Concello de Lugo, Rubén Arroxo, anunciou que este mércores o goberno local aprobará o inicio do procedemento para construír un cemiterio destinado a mascotas na contorna do actual cemiterio municipal, nunha parcela anexa duns 800 metros cadrados de extensión e con capacidade para 320 animais.
O novo espazo, explicou a Tenencia de Alcaldía, será pechado perimetralmente, e a zona interior será axardinada e contará con bancos e elementos que permitan crear un espazo íntimo para o recordo dos animais falecidos. Así mesmo, terá espazos para gardar as urnas dos animais incinerados, xunto a unha zona para gardar a chapa ou a cadea do animal. A esta actuación, o Goberno local destinará 151.154 euros. Realizarase priorizando o uso de materiais naturais e usará deseños respectuosos coa contorna.
320 MASCOTAS
O cemiterio contará cunha capacidade inicial de 320 mascotas en columbarios individuais para urnas, xunto cun espazo onde depositar cinzas. Ademais, haberá zonas de sombra ao plantarse 19 árbores en toda a área. A edil de Participación, Cristina López, destacou que o Executivo municipal leva meses traballando neste servizo que, avanzou, “permitirá atender a unha proposta que os veciños levan tempo reclamando”.
