A sección segunda da Audiencia Provincial de Lugo condenou a dous anos e medio de cárcere a un home acusado de estafar a varias persoas coa compravenda de vehículos. En concreto, o tribunal, que tivo en conta a atenuante de dilacións indebidas, considerouno autor dun delito de estafa agravada. Ademais, impúxolle o pago dunha indemnización a diversas empresas de 200.281 euros.
O tribunal considera probado que o acusado, actuando con ánimo de obter un lucro ilícito e mediante engano, presentou ante distintos concesionarios a persoas con solvencia para facerse con vehículos. En concreto, convenceu a unha das vítimas, coa cal tiña unha relación persoal e de confianza, para formalizar ao seu nome a compra e financiamento de cinco vehículos en diferentes concesionarios das provincias de Lugo e A Coruña, os cales foron entregados ao acusado, “que dispuxo dos mesmos e se lucró a costa allea vendéndoos no estranxeiro”.
A Sala afirma que, co mesmo ánimo de lucro e tamén mediante engano, consistente en presentar ante distintos concesionarios a persoas con solvencia, convenceu a unha muller para a compra e financiamento ao seu nome de varios vehículos en diferentes concesionarios das provincias de Lugo e A Coruña, facéndolle crer que lle abonaría o prezo dos mesmos.
“Unha vez recollidos nos concesionarios, os vehículos eran entregados ao acusado, que dispuxo dos mesmos, vendéndoos no estranxeiro”, sinalan os maxistrados, quen indican que, seguindo o mesmo modus operandi, o acusado convenceu a outras persoas para adquirir un vehículo Mercedes.
“Desta forma, o acusado eludiu as reclamacións xudiciais por falta de pagamento dos contratos de financiamento, lucrándose coa venda a persoas non identificadas dos vehículos adquiridos, provocando un prexuízo ás entidades financeiras cuxos créditos resultaron parcial ou totalmente impagados a pesar das reclamacións xudiciais e extraxudiciais efectuadas”, subliña a Audiencia Provincial.
