O xuízo oral contra un home acusado dun delito de tenencia ilícita de armas e de ameazar de morte a dúas persoas cunha escopeta nun establecemento de turismo rural situado nos arredores de Lugo foi suspendido este mércores na sala de vistas do Xulgado do Penal número 2 da capital lucense.
O procesado, un home de 50 anos con antecedentes penais por malos tratos no ámbito familiar, condución sen permiso de circulación e tenencia e porte de armas, compareceu no xuízo por videoconferencia para renunciar á defensa da súa letrada e da súa procuradora. Xa na quenda de cuestións previas, a avogada da defensa, designada de oficio, recoñeceu a existencia de “desavinzas” entre esta e o imputado, momento tras o cal o home manifestou ante a xuíza o seu desexo de renunciar aos servizos da letrada.
O acusado dispón agora dun prazo de 15 días para designar novos profesionais de maneira privada para o seu defensa na nova vista, que será reprogramada. Pola contra, a súa representación volverá ser asignada á quenda de oficio.
