A Comisión Executiva do Sindicato Nacional de Comisións Obreiras de Galicia convocou o próximo 11 de abril o Comité de Dirección Nacional, integrado polos responsables das federacións nacionais e das unións comarcais e intercomarcais, con obxecto de planificar a postura e folla de ruta da organización en relación co proxecto da sociedade Greenfiber, S. L. (Altri) no concello lucense de Palas de Rei, despois de que a federación de Industria manifestase o seu apoio.
Nunha nota de prensa, explica que os estatutos do sindicato en Galicia recollen que a independencia de CC.OO na comunidade “se expresa e se garante por medio do máis amplo exercicio da democracia e da participación dos traballadores na vida interna do sindicato”. “O sindicato nacional de CC.OO asume as súas responsabilidades e articula a súa liña de acción con independencia dos poderes económicos, do Estado, da comunidade autónoma e as súas institucións, dos partidos políticos e de calquera outro interese alleo aos seus fins”, manifesta.
Así mesmo, expón que demanda “unha aposta inequívoca pola economía sustentable” que teña como base a “eficiencia enerxética” e as “posibilidades de xeración de empregos verdes”. Ademais, sinala que “non se pode prescindir da creación de novos proxectos industriais para o cambio de modelo enerxético e produtivo que necesita Galicia”, sobre o que opinou que ese cambio “require reforzar a aposta polas enerxías renovables, mellorar os apoios e a seguridade dos investimentos das empresas”, así como “reforzar os medios para desenvolver políticas de prevención do risco químico e elaborar unha estratexia química sustentable ou química verde”.
“Debe establecerse unha estratexia integrada para a produción industrial limpa, baseada na prevención da contaminación, na xeración de menos residuos, e debe potenciarse o desenvolvemento rural a partir da xestión sustentable dos recursos naturais e dos bosques, incluíndo o aproveitamento enerxético da biomasa”, conclúe.
