Baleira, Cervantes e A Fonsagrada foron os concellos da provincia de Lugo máis afectados pola neve con acumulacións, nalgún punto, duns 12 centímetros. Así o informou a Deputación de Lugo que, durante a xornada deste venres, reforzou o operativo para paliar os efectos da neve nos concellos da provincia afectados nas últimas horas. Con todo, cara ao mediodía quedou aberta a totalidade da rede viaria provincial tras unha mañá de intenso traballo que se concentrou, principalmente, na montaña.

Ademais, os efectivos tiveron que actuar nas vías do concello do Saviñao, que tamén estiveron afectadas pola neve. En concreto, o dispositivo, nesa zona, reforzouse con tres máquinas, 10 operarios e dous vehículos de apoio. En total, o equipo despregado estivo composto por 58 operarios e 37 máquinas e vehículos e dispuxeron dos 12 silos de sal da Deputación abastecidos con 35 toneladas cada un.