O Xulgado do Penal número 1 de Lugo decretou este martes solicitar unha orde requisitoria para a localización e posta a disposición xudicial dun home acusado de abusar sexualmente da súa compañeira de piso na cidade de Lugo e para o que a Fiscalía solicita unha pena de dous anos de prisión.

A requisitoria foi cursada tras a incomparecencia do imputado no xuízo oral programado para este martes, que propiciou a suspensión da vista e motivou a solicitude da orde de busca e captura do acusado. Os feitos que se lle imputan e polos que deberá ser xulgado tiveron lugar na cidade de Lugo no mes de abril de 2018, no domicilio que o presunto autor e a vítima compartían en réxime de compañeiros de piso.

De acordo ao recolleito polo Ministerio Fiscal no seu escrito, o acusado ingresou unha noite na habitación na que se atopaba durmindo a súa compañeira e, coa intención de “satisfacer o seu ánimo lúbrico”, tombouse “completamente espido encima dela” procedendo a bicala e a tocarlle os peitos “sen o seu consentimento”.

A muller fixo todo o posible para que o presunto agresor se apartase, a pesar do cal o home continuou coa mesma actitude ata que a vítima logrou finalmente, precisa o escrito de acusación, que “cesase no devandito comportamento”. O Ministerio Fiscal, que entende que os feitos relatados son constitutivos dun delito de abuso sexual, solicitará para o acusado unha pena de dous anos de cárcere no xuízo oral que deberá ser novamente sinalado unha vez que o home, en paradoiro descoñecido, sexa localizado.