InicioSociedadeA irmá da muller asasinada en 2016 polo "mal funcionamento" da Casa...

A irmá da muller asasinada en 2016 polo “mal funcionamento” da Casa da Muller de Lugo recorrerá ao TSXG

Tras ser desestimada esta semana a súa demanda contra o Concello de Lugo polo Xulgado do Contencioso-Administrativo.

PUBLICADA O

- Advertisement -

Martina Gómez Nieto, irmá da muller asasinada polo seu esposo no municipio de Becerreá en febreiro de 2016 tras solicitar asistencia por violencia de xénero á Casa da Muller de Lugo, interporá un recurso ante o Tribunal Superior de Xustiza de Galicia (TSXG) tras ser desestimada esta semana a súa demanda contra o Concello de Lugo polo Xulgado do Contencioso-Administrativo.

Así o anunciou este xoves, nunha rolda de prensa convocada pola Plataforma Feminista de Lugo no salón de actos do edificio sindical, a propia Martina, que denunciou a existencia de “contradicións” nos testemuños ofrecidos durante o xuízo polos responsables da Casa da Muller, servizo dependente do Concello de Lugo.

“É unha realidade que o Concello de Lugo non asumirá responsabilidades con esta sentenza. É por iso que vou recorrer ao Tribunal Superior de Xustiza de Galicia”, comezou dicindo Martina Gómez Nieto, para acto seguido acusar novamente á Casa da Muller de cometer “un erro de xestión” en 2016 ao “non atender adecuadamente”, puntualizou, “a unha muller que implorou axuda ao devandito organismo e acabou asasinada a mans da súa parella”.

A rolda de prensa convocada pola Plataforma Feminista tivo lugar tan só tres días despois de que o Xulgado do Contencioso-Administrativo número 2 de Lugo desestimase o luns a demanda presentada pola muller contra o Concello da cidade polo “anormal funcionamento” do servizo ao entender que non quedaba acreditado “quebrantamento de protocolo algún” polo feito de que a asistente social “non presentase denuncia de oficio”.

“Esta sentenza evidencia o desamparo, a non reparación e a perda de dereitos das vítimas de Violencia de Xénero. Esta resolución supón unha laxa máis para acceder a unha atención real e eficaz e unha evidencia de que a cobertura institucional, se falla, é cómplice”, manifestou Martina Gómez Nieto, antes de “lembrar” que as mulleres vítimas de violencia “non teñen a obrigación de interpor unha denuncia para pedir axuda”.

“NON TEÑO NADA QUE GAÑAR NIN QUE PERDER”

A irmá da muller asasinada pola súa parella en Becerreá, que achacou ao “desinterese” do Concello o feito de que a praza de psicólogo da Casa da Muller leve cubrindo “a tempo parcial desde hai dous anos”, lamentou a “sentenza desfavorable” do Contencioso-Administrativo pero advertiu de que seguirá loitando para que se “emenden as deficiencias” do servizo de asistencia a mulleres vítimas de violencia.

“O fallo non me colleu por sorpresa porque mentiron e contradixéronse moito no xuízo, pero esta sentenza supón un retroceso bestial porque non van pór remedio ao funcionamento da Casa da Muller e están impunes”, valorou. O recurso que presentará ante o Tribunal Superior de Xustiza de Galicia é só un paso máis, explicou Martina Gómez Nieto, na súa cruzada por facer xustiza tras “oito anos de loita”. “Eu non teño nada que gañar nin que perder”, finalizou. Nunha liña moi similar manifestouse a portavoz da Plataforma Feminista de Lugo, Ana Torrón, presente tamén no acto, que cualificou o proceso xudicial encabezado por Martina como “unha carreira de fondo” semellante, dixo, á loita de “David contra Goliat”.

ÚLTIMAS

Tomé, en reunións con Altri e Ulloa Viva: “Fibras téxtiles si, celulosa non”

O presidente da Deputación de Lugo, José Tomé (PSdeG-PSOE), mantivo este martes dúas reunións con...

Collidos mentres “puenteban” o contador eléctrico dunha vivenda

Axentes da Policía Local de Lugo identificaron a dúas persoas por manipular os cables de...

Reunión de Altri con empresas forestais de Lugo para presentarlles o proxecto de Palas de Rei

Representantes de Greenfiber, formada pola enerxética Greenalia e a multinacional lusa Altri, reuníronse coa...

Dúas persoas faleceron tras chocar a súa furgoneta cun camión de cereal en Begonte

Dúas persoas faleceron este martes en Begonte ao chocar a furgoneta na que viaxaban cun...