O Grupo Municipal do Partido Popular presentou hoxe un escrito comunicando ao bipartito que se retira da Comisión de Festas do San Froilán. O concelleiro popular Javier Vázquez explica que deixan este órgano porque non se sinten representados nel.
Así, na misiva denuncia que se disfraza baixo a apariencia dunha comisión un “ordeno e mando”. “Non é unha comisión é unha sumisión xa que se utiliza este foro para informar dunha programación que xa teñen decidida con antelación. Aos dous días de xuntarnos desvelan nos medios de comunicación actuacións e actividades que nin mencionaron na xuntanza do luns”, denuncian os populares.
Tamén critican o “o ninguneo permanente do bipartito” porque non atendeu ningunha das súas proposta só a do pregoeiro e din que o PSdeG boicotea o San Froilán contraprogramando e apostando polo Caudal Fest.
“Non son as nosas festas. Non nos sentimos representandos nun programa no que hai moito de improvisación e irregulariedades en contratacións como a maquetación, edición e impresión de programas das festas cuxo contrato prorrogaron fóra de prazo e por iso se paga con reparo de legalidade”, conclúen.
