O Xulgado Contencioso Administrativo número 2 de Lugo desestimou, por segunda vez, a suspensión cautelar de derrube do edificio do Garañón que solicitou o Banco Santander, principal acredor da propiedade, por mor da inadmisión das medidas cautelarísimas que anteriormente reclamou a mesma entidade.
A demolición do inmoble comezou este mes de xullo despois de máis dunha década paralizado. Nese tempo, deu orixe a unha polémica xudicial e política que levou a dimitir ao que foi alcalde da localidade, José López Orozco, e ao secretario xeral do PSdeG entre 2013 e 2016, José Ramón Gómez Besteiro, tras ser imputados pola xuíza Pilar de Lara por suposta prevaricación relacionada coa licenza deste edificio.
En 2021, a Audiencia Provincial de Lugo arquivou este caso e exonerou de responsabilidade a ambos os dirixentes socialistas nun auto no que se indicaba que “non existían indicios da comisión de delitos”.
