A CIG presentou conflito colectivo contra a empresa Serveo, adxudicataria do servizo de limpeza do Hospital Lucus Augusti (HULA), “polos incumprimentos en materia de subida salarial“, sinala a central sindical.
Nun comunicado, indica que “a día de hoxe, a empresa aínda non abonou a unha parte das súas traballadoras e traballadores o 1,5% de incremento salarial adicional aprobado para o persoal do sector público”.
Respecto diso, explica que o persoal do servizo de limpeza do HULA “a pesar de estar externalizado, ten equiparadas as súas condicións salariais aos do grupo E do Sergas e, por tanto, teñen dereito a percibir o mesmo incremento que se acorde para o persoal empregado público“.
A CIG explica que se dirixiu por escrito a Serveo demandando o citado pago, pero asegura que só obtivo “silencio”. A central nacionalista entende que esta actuación supón “unha clara discriminación” polo que acordou presentar este conflito colectivo.
