Catro días despois de Noiteboa, Galicia alcanzou unha nova marca de contaxios por coronavirus nunha xornada ao rexistrar outros 3.468 positivos, que son un milleiro máis que os notificados o luns. Deste xeito, os casos activos continúan en escalada e superan xa os 28.000 ata marcar outro máximo da pandemia. Mentres tanto, a presión hospitalaria sobe con outros sete ingresados con covid, ata alcanzar os 305 en total na Comunidade. Unha situación que tamén afecta á area sanitaria de Lugo.

No que respecta ás novas infeccións, segundo os datos publicados este martes pola Consellería de Sanidade –actualizados ás 18,00 do luns–, a cifra de 3.468 implica bater a anterior marca de 3.100 do pasado sábado, 25 de decembro.

De todos os positivos notificados na última xornada, a área de Lugo-A Mariña-Monforte, subiron a 227, case 50 máis que a xornada anterior, sumando deste xeito 2.289 casos activos (+184).

SOBEN OS HOSPITALIZADOS

Se se observan as hospitalizacións, o Servizo Galego de Saúde (Sergas) contabilizaba este luns ás 18,00 horas –hora tomada como referencia para os datos publicados este martes– un total de 305 pacientes covid ingresados, sete máis que o día anterior. De todos eles, 249 están en planta (tres máis) e 56 en unidades de coidados intensivos (catro máis).

A presión asistencial sobe en tres das catro áreas sanitarias, menos na de Lugo-A Mariña-Monforte, onde os ingresados caen a 20 (-3), dos que seis (sen cambios) están en coidados intensivos.