O presidente da Deputación de Lugo, José Tomé, e a alcaldesa de Vilalba, Elba Veleiro, asinaron este martes un convenio de colaboración pola que a institución provincial achega 682.149,60 euros ao Concello para construír un parque acuático na zona recreativa da Madalena.
O mandatario provincial destaca que, deste xeito, cúmprese o “compromiso” alcanzado co municipio e cos veciños ao achegar o 80 por cento do investimento necesario deste proxecto. A administración local achega o 20 por cento restante, outros 170.500 euros.
A firma celebrouse na propia área da Madalena, desde onde José Tomé subliñou que a Deputación fai un “esforzo económico para colaborar co Concello de Vilalba neste proxecto”.
“Estamos a falar dunha cantidade que supera a partida de medio millón de euros que este concello percibe da Deputación con cargo ao ‘Plan Único’ neste ano 2021. Pero Vilalba, e esta iniciativa, ben merecen este esforzo”, explicou.
Ademais, o presidente provincial destacou o “importante efecto” que pode ter o parque acuático “á hora de promocionar Vilalba como destino turístico e de lecer” de carácter familiar.
Contará con tres piscinas: unha infantil de 0,45 metros de profundidade, unha de natación para uso deportivo de 1,55 metros de pofundidad máxima e outra recreativa de 1,20 metros. No caso do vaso infantil, compleméntase con chafarices de auga que potencien os xogos na área. Ademais, haberá tres zonas para tomar o sol.
Tamén contará cun edificio de servizos semienterrado nunha ladeira para non obstaculizar as vistas ao río. Nesta infraestrutura integraranse os cambiadores, os aseos, a sala de socorrismo, un almacén e unha zona para recepción.
