EFE | O Concello de Lugo concedeulle licenza á Diocese para converter un dos edificios máis emblemáticos da cidade, o Pazo de Velarde, na céntrica Praza de Santo Domingo, nun centro diocesano e en casa de misericordia.
O plan para rehabililtar este edificio e adaptalo ao seu novo uso foi presentado hai anos pola Diocese de Lugo, pero o goberno precisou que a licenza foi concedida unha vez que chegou a autorización por parte da Dirección Xeral de Patrimonio para realizar o proxecto de control arqueolóxico, unha resposta que foi recibida o pasado 13 de xaneiro. As obras contan cun orzamento de 1.186.055 euros e serán executadas nun prazo de 30 meses.
CAPELA DO CARME
Por outra banda, o Concello de Lugo informou de que investirá 70.000 euros para rehabilitar parcialmente a Capela do Carme, co fin de protexer “as xoias que contén dos séculos XVIII e XIX”.
Trátase dun templo situado no barrio do Carme, moi preto do lugar no que conflúen os tres elementos patrimonio da Humanidade da cidade: a muralla romana, o Camiño Primitivo a Santiago e a propia Catedral.
En principio, a intervención centrarase en rehabilitar o tellado e en mellorar o illamento exterior do templo. Segundo informou o propio Concello, a Diocese de Lugo cederá o terreo situado na parte traseira do templo para “dar novos servizos e contribuír á mellora da zona”.
