EFE | Máis de dous anos despois de comezar a reunir bicicletas vellas por toda Galicia con axuda da súa familia e de reparalas para volver poñelas en uso coa intención de envialas a África, José Luis Pereira, un garda civil de Tráfico natural de Lalín, que presta servizo na Comandancia de Lugo, logrou “pechar o círculo”.
Confirmou que chegaron xa a Guinea Bisáu un total de 175 bicicletas, que serán entregadas a persoas con poucos recursos no país africaso. Ata alí foron no mesmo contedor que fretou unha organización sen ánimo de lucro centrada no desenvolvemento local.
“Estamos moi contentos”, dixo Pereira a EFE, porque “isto é como pechar o círculo. É como cando planificas unha viaxe. Facer plans está ben, pero o que o ti queres é viaxar. Con isto pasa algo similar. Recollemos e reparamos as bicicletas para que chegasen a xente que as necesita e que vai usalas”.
De feito, recoñeceu que segue emocionado polos vídeos que lle chegaron de Guinea de persoas que recibiron unha bicicleta e que lle mostran o seu agradecemento. “Aínda que sexa en francés, isto levántalle o ánimo a calquera”, recoñeceu.
POR TODA GALICIA
Para reunir ese cargamento de bicicletas usadas, José Luis Pereira percorreu practicamente “todos os municipios de Galicia”, desde “O Vicedo ata Nigrán”. Todo comezou coa reciclaxe das bicicletas do seu propio fillo, porque tiña varias, case todas en bo uso, e á familia dáballe pena levalas “ao momento limpo”.
Aínda que puxo un cartel para anunciar que as regalaba, ninguén chamou, polo que, a través dun coñecido que traballa no ámbito dos proxectos sociais, púxose en contacto cunha organización sen ánimo de lucro e chegaron a un acordo para envialas ao país africano.
Foi daquela cando se decidiu a dar un paso máis e comezou a enviarlles mensaxes a algúns coñecidos para ver se “era posible reunir e enviar polo menos 20 ou 30”. Pasados dous anos, despois de facer cada semana uns “cincocentos quilómetros para recoller bicicletas usadas” por toda Galicia, logrou reunir “máis de catrocentas”.
O FUTURO DO PROXECTO
Viuse obrigado a pedir axuda, porque xa non tiña onde gardalas. Pestáronlle dous locais, onde as repara con axuda do seu fillo, de 13 anos, e da súa muller, dado que ambos están tamén moi involucrados neste proxecto social. “O meu fillo ten trece anos. Está nesa idade na que se pasa de neno a adolescente. Como o vexo a el tan implicado, iso tamén me anima moito para seguir adiante con isto. O seu interese fai que teña moitas máis ganas de continuar”, explicou.
De feito, a súa intención é preparar, cando sexa posible, un novo cargamento, porque algunhas das bicicletas recollidas e reparadas non puideron ser enviadas nun contedor que tamén transportaba material médico, roupa deportiva e outro tipo de produtos de necesidade que escasean no país africano. “Non poderá ser en 2021”, lamentou Pereira, pero “tentaremos mandar outro cargamento en 2022”.
Namentres, lembrou que está a atender peticións de diversos concellos, que chegan a través dos servizos sociais, para entregar bicicletas a nenos galegos de familias con poucos recursos.
“Aínda que é moi épico mandar bicicletas ao terceiro mundo, tamén é marabilloso axudar ao veciño do lado”, explicou, porque todo o traballo que supón esta iniciativa e algún que outro contratempo “queda compensado pola satisfacción que provoca ver a cara dun neno ou unha nena cando lla entregas”.
