O alcalde de Palas de Rei, Pablo Taboada, incorporouse este mércores ao seu traballo no Consistorio palense despois de recibir a alta tras superar a Covid-19.

O propio alcalde confirmou que está “ben”, aínda que recoñeceu que “foron días duros e non é fácil”. “Sempre estás preocupado, aínda que non tivemos moitos síntomas”, constatou. Neste sentido, Taboada reiterou que estivo bastante “ben” durante a convalecencia; no entanto admitiu que “a procesión vai por dentro”.

Así mesmo, o alcalde de Palas corroborou que se incorporaba este mércores ao Concello “con garantías e a empezar a traballar e que isto quede nun recordo”. “Que non haxa danos colaterais ou prexuízos futuros que é do que se trata”, desexou.

Taboada asegurou que o confinamento, de 15 días desde que se lle diagnosticou, levouno “ben” e “teletraballando desde casa e tentando facer algunha cousa”. Finalmente admite que algún día notou a “fatiga” e que algunha desas xornadas estivo “canso”.  “Afectoume suave, non foi demasiado duro e levámolo ben, aínda que os días de confinamento non foron fáciles”, confesou o rexedor palense.