Mari Carmen Fernández, unha usuaria da residencia de Burela de 85 anos, foi este martes a primeira persoa vacinada de coronavirus na provincia de Lugo. Un momento de “moita emoción”, recoñeceu, admitindo estar “alucinada” polo xeito no que “os científicos atoparon en tan pouco tempo a vacina. Quero publicamente darlles as grazas e a todas as persoas que colaboraron con isto; estabamolo pasando moi mal e isto é unha sorte moi grande”, afirmou.
“A ver se saímos desta”, sinalou Fernández, que atribuíu a vitalidade e súa xuvenil apariencia -ninguén diría que naceu no 1935– “ao ben que me coidaron” no xeriátrico, de titularidade pública. “Isto é a solución, a salvación, e xa quixen apuntarme ás probas para perfeccionar a vacina, pero non mo permitiron pola miña idade”, afirmou.
“Aguantamos moito, pasámolo moi mal”, resumiu en relación coas longas tempadas que pasaron illados os usuarios nas residencias, que en moitos casos convertéronse en trampas mortais con abrochos que provocaron numerosas mortes entre pacientes especialmente vulnerables. “Agora síntome liberada, libre deste pesadelo”, remarcou Fernández, que terá que recibir unha segunda dose para que a vacina sexa plenamente efectiva.
Please wait while you are redirected...or Click Here if you do not want to wait.
