EFE | O xerente da área sanitaria de Lugo, A Mariña e Monforte de Lemos, Ramón Ares, explicou que esta provincia ten unha das porcentaxes de prevalencia do Covid-19 “das máis baixas” de toda España, un 4,3%. Isto significa que moi pouca xente pasou aínda a enfermidade entre a poboación lucense e, consecuentemente, que o nivel de inmunización fronte ao virus é moi baixo.
Ares, que citou o estudo elaborado polo Instituto de Saúde Carlos III e o Ministerio de Sanidade, lembrou que noutros lugares do país a prevalencia é moi superior, o que indica que moita “máis xente pasou a enfermidade” e, polo menos en teoría, está “inmunizada” fronte ao virus.
Con todo, lembrou á prensa que para chegar a esa situación tiveron que pagar un prezo, dado que a maior incidencia do virus tamén aumentou a mortalidade, a presión asistencial sobre o sistema público de saúde e os ingresos en UCI.
Aínda que neste momento en Lugo hai “máis poboación susceptible de infectarse”, Ares confía en que a provincia chegue “coa vacinación” (que podería empezar xa no principio do ano) a esa “inmunidade” que nos podería facer ver “o final da pandemia”.
