As vítimas que deixa a pandemia do coronavirus en Galicia eleváronse a 1.246, tras falecer nas últimas horas seis persoas diagnosticadas con covid-19, e informar a Xunta doutros catro falecidos da residencia de Vilalba do mes de novembro e decembro que non se contabilizaran ata agora por unha “incidencia informática”.
Segundo os datos facilitados este mércores pola Consellería de Sanidade, trátase de tres homes e de sete mulleres. Todos eles presentaban patoloxías previas.
Así, a Xunta informou da morte de tres mulleres de 82, 96 e 93 anos e dun home de 80 na Residencia Vilalba que faleceron entre a segunda quincena do mes de novembro e o que vai de decembro e que non foron comunicados “por mor dunha incidencia informática”.
Por outra banda, faleceron dúas persoas, un home de 69 anos e outra muller de 93 no Chuac, na Coruña; outros dous no Chuf, de Ferrol, dúas mulleres de 91 e 94 anos e outras dúas persoas no Chuvi, de Vigo, un home de 86 e unha muller de 74.